ನನ್ನ ನೆನಪುಗಳಿಗೆ ಕೇಜಿ ತೂಕವಿಲ್ಲ
ನಾಲ್ಕಾಣೆಗೆ ಬೆಳೆಬಾಳಲ್ಲ !
ಅರ್ಧ ಮೂಟೆ ಹತ್ತಿಯ ಹಗುರ!
ಹತಾಶೆಗೆ ನೆನೆದರೂ ಭಾರವಾಗಿಲ್ಲ!
ನೆನಪಂತೆ ಬದುಕಂತೆ ಕನಸಂತೆ !
ಈ ಮೂರಕೂ ನಡುವೆ ಸಂಬಂಧವಿಲ್ಲ
ವ್ಯಂಗ್ಯ ನಗು ನಕ್ಕು, ನೋಡಿ ನನ್ನ ಬಾಳ
ಕಾಲವೂ ನನ್ನೆದುರು ಕೈಚೆಲ್ಲಿತಲ್ಲ!
ನೆನಪುಗಳ ಮಾರಾಟಮಳಿಗೆ ತೆರೆದಿರುವೆ
ಕೊಂಡು ಹೋಗಿ ಬೇಕಾದರೆ ನೆನಪುಗಳನು.
ಬಿಕರಿಬೆಲೆಗೆ ಮಾರುವೆ ಹೊತ್ತು ಕಳೆದಂತೆ
ಇನ್ನು ಕಾದರೆ ಒಯ್ಯಬಹುದು, ಬಿಟ್ಟಿಯಂತೆ !
ಹಿಂದೆ ನೋಡಿದರೆ ಬರಿಯ ಬಯಲು
ನಿಮಗೆ ನೋಡಲು ದಟ್ಟಕಾಡದು!
ಹೇಳೋಕಾಗದ ನೂರೆಂಟು ತ್ರಾಸು !
ಕಾಯಲು ಯಾರಿಲ್ಲ ನೆನಪೆಂಬ ರಾಸು
ಬದಕಂತೂ ಕೇಳಲೇಬೇಡಿ ದಯಮಾಡಿ
ನನ್ನದೇ ಬಾಯಲ್ಲಿ ಹೊಗೆಯೆಬ್ಬಿಸಿ ,
ಸುಡುತ್ತ ಒಳಗೊಳ್ಗೆ ಪೂರ್ತಿಯಾಗಿ ,
ತಾನೂ ನಶಿಸುವ ಮೂರ್ಕಾಸಿನ ಬೀಡಿ ಅದು!
...ಇನ್ನು ಕನಸಿನ ಬಗ್ಗೆ ಸಧ್ಯ ಮಾತಾಡಲ್ಲ ಬಿಡಿ
No comments:
Post a Comment