ಕಣ್ಣು ಕಿವುಡಲ್ಲ... ಕಿವಿ ಕುರುಡಲ್ಲ!!!

ಕಿವಿ ಕುರುಡಲ್ಲ ಕಣ್ಣ್ಕುರುಡಾಗಿರಲು

ನಿಜವು ಸುಳ್ಳಲ್ಲ ಕಣ್ಣು ನೋಡದಿರೆ ಏನು?

ಕಣ್ಣು ಕಿವುಡಲ್ಲ ಕಿವಿ ಕಿವುಡಾದರೇನು!

ಮನಸ್ಸಲ್ಲಿ ಸತ್ಯ ನೊಂದಾಯಿಸಲು

ಅದು ಕಿವಿಯಾದರೇನು ಕಣ್ಣಾದರೆನು ?

ಕಣ್ಣು ಇಷ್ಟು ದಿವಸ ನೋಡಿ ಸುಳ್ಳನು

ಸಾಧಿಸಿರುವುದಾದರೂ ಏನು ?

ಕಿವಿ ಸುಳ್ಳು ಸೊಲ್ಲುಗಳನೇ ಕೇಳಿ

ನಂಬಿರುವುದಾದರೂ ಏನು ?

ಹೀಗಿರಲು  ಆಧ್ಯತೆ ಯಾರಿಗೆ? ಕಿವಿಗೋ ಕಣ್ಣಿಗೋ ?

ಮೆದುಳಿಗೆ ಅದಾವುದಾದರೇನು ಕಣ್ಣೋ? ಕಿವಿಯೋ ?

ಕಣ್ಣು ಕಿವಿಗಳೆರಡನ್ನೂ ನಂಬದದು .

ತಾನೇ ಸತ್ಯವೆಂದು ನಂಬಿಹ ನಿರ್ಭಾವುಕವದು.

ಕಣ್ಣ ನಂಬಿಹೆನೆಂದು ಕಣ್ಣ ಕಣ್ಣೊರೆಸುತಾ

ಕಿವಿಯೇ ತನ್ನ ಕಣ್ಣೆಂದು ಹುಸಿ ನುಡಿದಿಹುದು.

  

ಕಣ್ಣು ಕಾಣುವುದೆಲ್ಲ ಸತ್ಯವೆಂದಾದರೆ

ಹುಟ್ಟುಗುರುಡನಿಗೆ ಸತ್ಯದರ್ಥ ತಿಳಿದಿಲ್ಲವೇನು ?

ಕಿವಿಯೇ ಶ್ರೇಷ್ಠ ವೆಂದಾದರೆ ಕೆಪ್ಪನು

ತನ್ನ ನಿಂದನೆಯ ಸತ್ಯವ ಕಾಣಲಾರನೇನು ?

ಆದರೂ ಸುಮ್ಮನಿರುವ ಆತ ಕುರುಡನೂ ಆಗಿಲ್ಲವೇನು ?

 ಸುಳ್ಳು ನುಡಿಯದೆ ಸುಮ್ಮನಿದ್ದ ಮಾತ್ರಕೆ

 ಕಣ್ಣ ಕಿವಿಗಳ ಉಸಾಬರಿ ಧಿಕ್ಕರಿಸಿ

 ಕಿವುಡ ಕುರುಡನೆರಡೂ ಆಗಿರುವ

 ತನ್ನತನವ ಮರೆತ ಮೂಕನಲ್ಲದವನ

 ಸತ್ಯ ವಿವರಿಸದ ನಾಲಿಗೆ ಸುಳ್ಳಲ್ಲವೆನು?